Psa 29 | TVK | STEP | Suv toto Deved iaxa tetisi !Masxaxa xil te ut nesao, musa memesien mi Iahova! Mumesi ve minahinen te xeihen nan.

Psalms 29

Xeihen de rae na Hi

Suv toto Deved iaxa tetisi

1 !Masxaxa xil te ut nesao, musa memesien mi Iahova!
Mumesi ve minahinen te xeihen nan.
2 !Musa memesien mi Iahova e mupet rat hisen xa be eilep mak mu!
Mumot mi Hi xa be eo e di minahin pupu.

3 Rae na Iahova di misel e mesal te tas,
Hi te minahinen, sepinien nan mirum nggoni veta xa di mirum nesao e tilang hat.
4 Rae na Iahova nggeih pupu,
e di pisen ni xa xi be eilep mak mu mili holesok sav xil.

5 Rae na Iahova nggoni votiang xa mu nggeih xa mikila vatal vuvul vatiei xil xa tellep,
e mikila mun vatal vul vatit sida xil. ^{▼▼29:5 Vatit sida be vatiei tei xa mahulong pupu mili vatiei sav xil. Xil latepiei duxoh 27 mita e moletin lu e le sav (7) iaxa lakila lateli hexil tengan lakapis xole.}
6 Xeihen te raen pol ni hu xil tahal Lebanon e Vathu Hermon lamulul.
Di lamulul nggoni tutut buluk e di labutahut nggoni buluk reran tei.

7 Rae na Iahova, xeihen da en
nggoni xeihen xa rapusi melele xa ut milangas.
8 Raen pol ni tan mulul e uruvuol.
Io, e uruvuol tahal Kates, raen misak ni tan di mulul.
9 Rae na Iahova minggui len vatit eal xil xa tellep,
e pol ni uvei tuvuol mun e xol suse.
E, e Nim Eo nan, moletin xil vus lakei nggeih labit,
“!Ripet rat his Hi ihe nesao!”
10 Iahova be Suv te huinep te tas.
Reitin xi be Suv te holesok xil vus, xosali e vehakut.
11 Iahova misa xeihen mi moletin nan xil,
e di misak ni xil ladi e tomat nan.